ប្រាសាទអាណា និងផ្តែរ ស.ត ទី ១១ (ថត ១៩៧៩)អ្នកស្រុកក្នុងតំបន់ នាំគ្នាហៅប្រាសាទនេះថា ប្រាសាទអាណារ តាំងពីសម័យបុរាណកាលមក ។ ប្រាសាទនេះ ត្រូវបានជនជាតិខ្មែរ ក្នុងតំបន់ចាត់ទុកជាទីតាំងមួយដ៏ស័ក្តិសិទ្ធិ ។ យោងតាមថេរដីការបស់លោកចៅអធិការវត្តអាណារ ពីដើមនៅត្រង់ប្រាសាទនេះ ដែលស្ថិតនៅក្បែរបឹងមួយយ៉ាងធំនោះ គឺជាកន្លែងមួយដ៏សែនស័ក្តិសិទ្ធិ ។ បងប្អូនជនជាតិខ្មែរតែងមកបន់ស្រន់សុំទឹកភ្លៀង ដោយពួកគេ ធ្វើពិធីបញ្ជាន់អារក្ខ នៅលើទួលប្រាសាទនេះ ។ ឥឡូវនេះ ប្រពៃណីនេះ ត្រូវបានបោះបង់ចោលទៅហើយ ។ ព្រះអង្គ ក៏បានបង្ហើបឲ្យដឹងទៀតថា លក្ខណៈពិសិដ្ឋ នៃប្រាង្គប្រាសាទអាណារនេះ ក៏បណ្តាលមកពីវត្តមានរបស់ចម្លាក់ តំណាងឲ្យព្រះបដិមាបុរាណមួយអង្គ ដែលមានដៃច្រើន នៅក្នុងតួប៉មនៃប្រាសាទនេះ តែឥឡូវត្រូវពួកចោរអន្ធពាល លួចប្លន់ទៅលក់ ឯទីក្រុងមឿងកក់ (បាងកក) បាត់ទៅហើយ ។
និយាយជារួមទៅ បូជនីយដ្ឋានអាណារ ត្រូវបានគេបោះបង់តាំងពីយូរមកហើយ មានភាពស្ងប់ស្ងាត់ លើកលែងតែថ្ងៃមានបុណ្យទាន ។ ម្យ៉ាងទៀត គ្មានបរទេសណាមកទស្សនាទេ ។
ប្រាសាទវត្តអាណារមានតួប៉មតែមួយ ដោយជ្រុងនីមួយៗទំហំប្រមាណជា ៤ ម៉ែត្រ ។ ដូចប្រាសាទដទៃៗឯទៀត ក្នុងភូមិភាគឥសាន នៃប្រទេសថៃដែរ ប្រាសាទអាណារបានបន្សល់ទុកនូវផ្ទាំងក្បាច់ផ្តែរមួយ ដាច់ពីរកំណាត់ ។ សសរពេជ្រធ្វើអំពីថ្ម ត្រូវគេលួចបាត់ទៅហើយ នៅសល់តែផ្នែកខាងក្រោមស៊ុមទ្វារ ដែលស្ថិតក្នុងភាពផុយ រេចរឹលគួរឲ្យខ្លោចផ្សាចិត្ត ។ កន្លងមក យើងបានចូលនៅក្នុងតួប៉ម ពិនិត្យមើល តែពុំបានឃើញមានចម្លាក់អ្វីទាំងអស់ ។ ផ្ទាំងផ្តែរ ដែលបាក់បែក ដែលស្ថិតនៅមុខទ្វារប្រាសាទនោះ លំអដោយក្បាច់ចម្លាក់តំណាងឲ្យអាទិទេពមួយអង្គប្រថាប់លើក្បាលរាហ៊ូ ដែលផ្នែកក្រោមបាក់បែកមួយចំហៀងធំ ហើយកប់ក្នុងដី ។
អ្នកស្រុកជិតឆ្ងាយ រមែងតែបន់ស្រន់ក្បែរប្រាសាទនេះ ដើម្បីសុំសេចក្តីសុខសប្បាយជាពិសេស នៅថ្ងៃពេញបូរមី ទោះបីជាប្រាសាទដ៏ចាស់ជរានេះ ស្ថិតក្នុងស្ថានភាពទ្រុឌទ្រោមខ្លាំង យ៉ាងណាក៏ដោយ ។ ទង្វើនេះ ជាប្រការមួយជាក់ស្តែងបង្ហាញឲ្យដឹងថា ក្នុងក្រសែភ្នែករបស់ជនជាតិខ្មែរ ប្រាសាទនេះ នៅតែជាទីគោរពបូជា តាំងពីដើមរៀងមក ទោះបីជាទីតាំងនៃប្រាសាទនេះ ត្រូវបានប្រែក្លាយទៅជាពុទ្ធមណ្ឌលក៏ដោយ ។ ប្រាសាទវត្តអាណារជាប្រាសាទតូច មិនសូវមានក្បាច់រចនាផ្ចិតផ្ចង់ទេ ព្រោះស្ថិតនៅតំបន់ចុងកាត់មាត់ញក ។ មួយវិញទៀត ការដែលប្រាសាទនេះ ត្រូវបានសាងសង់នៅលើខឿនថ្មបាយក្រៀមមួយ ដែលមានរាង ៤ ជ្រុងទ្រវែង ស្ថិតនៅទីខ្ពស់ធ្វើឲ្យយើងមានអារម្មណ៍ថា ប្រាសាទនេះហាក់ដូចជា មានលក្ខណៈខុសប្លែកពីប្រាសាទខ្មែរដទៃៗ ក្នុងតំបន់វាលទំនាប ។ តែយ៉ាងណាក៏ដោយ ក៏ប្រាសាទរបស់យើងតំណាងឲ្យភ្នំសុមេរុយ៉ាងប្រាកដ សាងសង់តាមលោកធាតុវិទ្យាឥណ្ឌា ដើម្បីជាទីគោរពសក្ការៈព្រះអាទិទេព ដ៏មានមហិទ្ធិឫទ្ធិ នៃលទ្ធិព្រហ្មញ្ញសាសនា ៕
ប្រភព http://www.cen.com.kh/culture
No comments:
Post a Comment