អ្វីដែលគួរកត់សម្គាល់នៅទីនេះ គឺថា វត្តមានរបស់ចម្លាក់ មនុស្សតឿ ឬមនុស្សគោមបែបនេះ ក៏ត្រូវបានជួបប្រទះនៅក្នុងបរិវេណនៃប្រាសាទកោះកេរ ដែលជាស្នាព្រះហត្ថរបស់ព្រះបាទជ័យវរ្ម័នទី៤ ពោលគឺនៅក្នុងស.វទី១០នៃគ.ស ។
ជាទូទៅ ទេវរូបខាងលើនេះ ស្លៀកសំពត់ចងក្បិនខ្លីមួយនៅចង្កេះ ស្ថិតក្នុងឥរិយាបថអង្គុយ ជង្គង់លុតមួយទាបមួយខ្ពស់ ។ ថ្វីត្បិតតែដៃទាំងពីរ ត្រូវបានបាត់បង់ក្តី ក៏ប៉ុន្តែយើងអាចដឹងថា ស្ថិតក្នុងឥរិយាបថសំពៈ ឬអង្វរក ។
បើសំអាងលើទេវកថាវិទ្យាបែបព្រាហ្មណ៍និយម យើងអាចដឹងថា ចម្លាក់មនុស្សតឿខាងលើនេះ គឺជាអវតាររបស់ព្រះវិស្ណុយ៉ាងប្រាកដ ។
មនុស្សគោម ថ្ម សម័យបាយ័ន ដែល Bunker & Latchford បានប្រគល់ជូនសារមន្ទីរជាតិវិញ (ម.ត) និងរូប សំរិទ្ធិ ផ្សព្វផ្សាយ អត្ថបទសិលាចារឹក មិនបាននិយាយដល់សារសំខាន់របស់មនុស្សគោមឡើយ ប៉ុន្តែតាមរយៈការស្រាវជ្រាវ យើងអាចឃើញនូវអត្ថន័យស៊ីជម្រៅរបស់ចម្លាក់តំណាងមនុស្សគោមទាំងនោះ ដែលគេបានជួបនៅតាមទេវស្ថាន និងពុទ្ធសាសនដ្ឋានខ្មែរ ។
ជានិច្ចកាល វត្តមានរបស់ចម្លាក់ទាំងនោះ រួមបញ្ចូលមនុស្សគោមពិតៗផងនៅតាមក្លោងទ្វារចូលកាន់សាសស្ថាន បង្ហាញនូវការួមបញ្ចូលគ្នារវាងតម្លៃសីលធម៌នៃព្រហ្មញ្ញសាសនា រួមចូលជាមួយឧត្តមតីបែបពុទ្ធនិយមផង ។
ចំពោះសាសនិកជន គេច្រើនតែធ្វើអំណោយទៅមនុស្សគោមទាំងនោះ នៅពេលដែលគេទៅបន់ស្រន់ ឬសំពះព្រះម្តងៗ ហើយពួកមនុស្សគមទាំងនោះអាចនឹងរស់រានមានជីវិតបាន ក៏ដោយសារសប្បុរសធម៌របស់ពួកសាវ័ក ឬឧបាសិការមែងតែធ្វើអំណោយជាម្ហូបអាហារ ឬអំណោយផ្សេងៗ ។
កុំភ្លេចថា អំណោយតូចធំទាំងឡាយ សុទ្ធសឹងជាយន្តការចាំបាច់ ស្តែងចេញពីករុណាធម៌មេត្តា ឬព្រហ្មវិហារធម៌របស់ពុទ្ធសាសនិកក្នុងសម័យវប្បធម៌បាយ័ន ។
ការពន្យល់ន័យដូច្នេះ អាចទទួលបាន ក៏ប៉ុន្តែមិនទាន់គ្រប់គ្រាន់ទេ ។ ដោយហេតុថា បើសំអាងលើការសិក្សាស្រាវជ្រាវរបស់លោកម៉ាល្លើរេ យើងអាចដឹងថា ក្នុងវប្បធម៌បុរាណក៏ដូចជាវប្បធម៌នាសម័យទំនើបមួយចំនួនផងដែរ ការនិយមប្រតិបត្តិមនុស្សតឿ ឬគមត្រូវបានលើកតម្លៃយ៉ាងខ្ពស់ដោយមូលហេតុសាសនា ។ ដូច្នេះហើយបានជាសព្វថ្ងៃនេះនៅតាមបូនីយដ្ឋាន វត្តមានរបស់ក្រុមមនុស្សគម ឬតឿដែលជាអ្នកសូមទាននៅតែមាន ទោះបីជាសង្គមខ្មែរត្រូវបានឆ្លងកាត់នូវការកែប្រែទម្រង់យ៉ាងណាក៏ដោយ ។
ឆ្លៀតឱកាសនេះ សូមរំលឹកផងដែរថា រហូតដល់សព្វថ្ងៃ តាមរយៈអត្ថបទអក្សរសាស្ត្រខ្មែរមួយចំនួន ភាពពិការរបស់មនុស្សខ្លះ ក្នុងក្រសែភ្នែករបស់អ្នកស្រុកខ្មែរខ្លះ មិនត្រូវបានគេចាត់ទុកថា ភាពពិការគឺជាបាតុភូតធម្មជាតិទេ ក៏ប៉ុន្តែជាលទ្ធផលនៃការចាប់ជាតិរបស់ទេពតាទៅវិញ ដូចករណីរឿងព្រហ្មកិលជាដើម ដែលជាភ័ស្តុតាងដ៏ជាក់ស្តែមួយ ក្នុងបណ្តាភ័ស្តុតាងផ្សេងៗឯទៀត ៕ (ម.ត្រាណេ)
ប្រភពដើម http://www.cen.com.kh/culture/detail_culturereligion/YjNjMmEyMTJhYjU
No comments:
Post a Comment